LONDON, AP.- E desishon provokador di promé minister Boris Johnson pa suspendé Parlamento britániko momentáneamente, promé ku e ‘deadline’ pa bandoná Union Europeo a generá kritiká i protesta na London i otro siudatnan.
E marchanan a keda organisá despues di un debate den Parlamento e siman aki kaminda opositornan di Johnson a purba batayá pa aprobá un lei ku ta impedí ku Brexit ta sosodé sin un akuerdo riba 31 di òktober.
Mas o ménos 10.000 persona a kongregá den e sentro di London, miéntras otronan a manifestá na Belfast, York i vários siudat mas pa mustra su determinashon pa blòkia un Brexit “sin akuerdo”. E manifestantenan na London a blòkia tráfiko riba un brùg den sentro di e siudat i plasa Trafalgar.
E lider di e Partido Laborista, Jeremy Corbyn, kende a pidi su partidarionan pa sali masalmente riba kaya, a bisa ku e mensahe pa Johnson ta simpel: “No tin otro manera. Ta nos parlamento”.
E desishon di Johnson pa sera Parlamento durante vários siman a impulsá e manifestashonnan di djasabra. Organisadónan a bisa ku tabatin diferente protesta den mas di 30 siudat na Inglatera, Eskosia, Gales i Northern Ireland.
