CORPUS CHRISTI, TEXAS, AP.- E direktor di Agensia Federal di Maneho di desaster a bisa djadumingu ku orkan Harvey ta un “suseso históriko” i ku e ofisina lo konsentrá den e zonanan mas afektá di Texas.
Brock Long a deklará den e programa “State òf the Union” di CNN ku kasi 5.000 persona di gobièrnu federal ta den mishonnan di búskeda di reskate. El a agregá ku ainda mayoria persona ta yegando na sentronan di refugio.
E gobernador di Texas Greg Abbott a bisa djadumingu ku boto i helikòpternan a wòrdu desplegá pa sostené e reskatenan den zonanan di Houston i partinan di e estado aki kaminda tabatin inundashonnan repentino despues ku orkan Harvey a pasa.
E gobernador a bisa ku “nan no por ta mas agradesido” pa yudansa di gobièrnu federal i presidente Donald Trump.
Abbott a duna deklarashonnan riba e tema den programanan “Fox News Sunday”, “ThisWeek”, di kadena di ABC i “State of the Union” di CNN.
Despues ku orkan Harvey a pasa, presidente Donald Trump a bisa djadumingu riba Twitter ku e lo biaha pa Texas “mas pronto ku e por sin kousa interupshonnan”.
El a agregá ku e prioridat mester ta “bida i seguridat”.
E inundashonnan den algun parti di kondado di Harris, ku ta inkluí e siudat di Houston, ta asina severo ku outoridat ta pidiendo tur hende pa subi nan dak di kas pa keda safe.
