BOGOTA, COLOMBIA, AFP.- E deskubrimentu resien di un refugio improvisá nobo, algun fruta ku a morde aden i un paña chikí ta pone ku ehérsito kolombiano ta pensa ku nan ta “hopi serka” di haña e kuater muchanan indígena ku ta pèrdí ya pa 30 dia kaba den Amazonia.
Ehérsito a informá djamars tokante un serie di indikashonnan di pista di e muchanan di 13, 9, 4 i un aña, ku tabata biahando huntu ku nan mama i dos adulto mas den un avioneta ku a kai riba 1e di mei den selva na sùitost di e pais.
E kadaver di e tres adultonan a keda deskubrí pa ehérsito kaminda e aksidente a tuma lugá, pero ainda no a lokalisá e muchanan.
E pistanan nobo deskubrí djadumingu “ta konfirmá dos kos: na promé lugá nan ta bibu i di dos ku nos ta hopi serka”, segun indikashon di general Pedro Sánchez na Blu Radio. E ta responsabel pa e 160 militarnan ku ta buskando e muchanan den un region entre e departamentonan di Caquetá i Guaviare. Mas o ménos 70 indígena ta embolbí den e búskeda.
Na komienso di e búskeda, a buska e rumannan den un área grandi, di mes tamaño ku e provinsia kompleto di Buenos Aires (323 kilometer kuadrat). Pero e deskubrimentunan nobo ta permití redukshon di área di búskeda “ku mas o ménos 20 kilometer kuadrat”, Segun indikashon di Sanchez.
