STOCKHOLM, AP.- 100 aña despues ku Titanic a senk, dos investigador sueko a bisa djaweps ku na momentu ku ta trata di barkunan a punto di senk, e konsepto di kabayerosidat maskulino “ta un mito” i mas hòmber ta sobrebibí den tipo di desasternan asina ku muhé i muchanan chikitu.
E ekonomistanan Mikael Elinder i Oscar Erixon, di e Universidat Uppsala, a analisá e 18 desasternan marítimo mas konosí na mundu di 1852 na 2011. Nan a saka afó ku e echo ta ku hòmber tin un bentaha di sobrebibensia mas grandi ku hende muhé.
Di 15.000 persona ku a muri den aksidentenan aki solamente 17.8% di hende muhé na bordo a sobrebibí den komparashon ku e 34,5% di e hòmbernan.
E rapòrt di 82 página ta indiká ku Titanic tabata un eksepshon hopi straño pasobra su kapitan a menasá di tira e hòmbernan si nan no habri kaminda pa e muhénan por pasa.
Elinder a bisa djaweps ku na momentu ku ta trata di barkunan ku ta senk “ta parse ku tur hende ta bisa, es ku por, salba su mes”.
