GINEBRA, AP.- E ofisina di derechi humano di Nashon Uní a pidi e gobièrnu di Donald Trump pa “stòp inmediatamente” ku su polítikanan di separá muchanan di nan mayornan despues ku e famianan drenta Merka di forma iregular despues di krusa frontera di Mexico.
E bosero di Komishonado di Nashon Uní pa derechi Humano, Rabina Shamdasani, a kritiká Merka pa separá sentenar di muchanan di nan mayornan, despues ku nan a wòrdu enkarselá pa drenta e pais ilegalmente.
“E uso di detenshon di inmigrantenan i e separashon familiar komo medida di protekshon ta kontra e normanan i prinsipionan di derechi humano”, asina Shamdasani a agregá durante un seshon informativo na Ginebra.
E gobièrnu di Trump a adoptá un polítika nobo di ‘sero toleransia’ ku a aselerá e separashon di famianan despues di krusa frontera. E lei, anunsiá den aprel pa sekretario di hustisia Jeff Sessions, ta ordená outoridat pa prosesá tur kaso di krusamentu ilegal na frontera.
E tema a kousa un debate polítiko den Merka promé ku elekshonnan legislativo di mitar mandato, na final di e aña aki.
Ounke e polítika no ta menshoná separashon di famia, e protokòl di Merka ta prohibí pa detené muchanan huntu ku nan mayornan, pasó e muchanan no ta akusá di un delito i e mayornan si.
