NASHON UNI, AP.- E 193 estadonan miembro di Nashon Uní a skohe e eks promé minister portugues Antonio Guterres komo sekretario general nobo di Nashon Uní.
E presidente di Asamblea General, Peter Thompson, a presentá e resolushon. El a bisa ku miembronan kier a aprobá e aklamashon aki i miembronan a interumpié ku aplouso.
Guterres, di 67 aña, hefe di agensia di Nashon Uní pa refugiado durante 10 aña, lo asumí komo susesor di Ban Ki-moon dia promé di yanüari. Esaki lo ta e di nuebe sekretario general di e organisashon den su 71 aña di historia.
Konseho di Seguridat a postul’é pa aklamashon siman pasá siguiendo un di seis votashon informal.
Guterres a gana e seis votashonnan, kual a inkluí 13 kandidato: shete muhé i seis hòmber.
Ademas di goberná Portugal entre 1996 i 2002, Guterres a okupá e puesto di Komishonado di Nashon Uní pa Refugiadonan entre 2005 i 2015.
E nominashon di Guterres a desepshoná esnan ku a hasi kampaña pa un muhé liderá e organismo internashonal pa promé biaha. Pero e diplomátikonan a vota pa e mihó kandidato posibel sin tene otro kriterionan na kuenta.
Entre e responsabilidatnan di Guterres, e mester enfrentá temanan manera derechonan humano, refugiado i kambio di klima manera rekoudashon di fondo pa múltiple kampaña di e organisashon.
