KANO, NIGERIA, AFP.- Estado Zamfara a habri su skolnan bèk djaluna, kuater luna despues ku a sera nan a kousa di sekuestronan masivo di studiantenan, segun indikashon di gobièrnu lokal.
Skolnan na Zamfara a sera den sèptèmber despues di sekuestro di 80 alumno di un skol sekundario den Kaya Village. Esaki tabata solamente un di e serie di sekuestronan masivo di skolnan den e área kompleto di nortwèst di Nigeria.
Un total di 115 skol a haña òrdu pa resumí lès. 85 skol mas lo keda será te ora e situashon di seguridat drecha, segun un komunikado.
Nortwèst i sentral di Nigeria a wòrdu impaktá severamente pa atakenan di gangnan kriminal, ku ta ehekutá razianan den pueblonan di Nigeria, sekuestrá residentenan i kima nan kasnan.
