PARIS, AP.- Outoridatnan franses a detené ocho persona mas en konekshon ku e atake di Bastille Day na Nice. Esaki a laga 86 persona morto, segun informashon di prokurador di Paris.E sospechosonan detené djaluna tabata franses i tunesionan i tabatin vínkulo ku e atakante, Mohamed Lahouaiej Bouhlel, kende a dal un trùk di 19 tòn kontra un multitut di hende ku a reuní riba Promenade de Anglais pa presensia un show di vürwèrk dia 14 di yüli, segun indikashon di e prokurador.E ocho sospechosonan a wòrdu detené den region di Alpes- Maritimes, na sùitost di Fransia ku ta inkluí Nice.
Por lo ménos sinku persona ya kaba ta enfrentá kargonan preliminar di terorismo pa e atake i ta akusá di e yuda Bouhlel haña arma i duna otro tipo di sosten. No tabata evidente di kiko esnan detené ta wòrdu sospechá di dje.
Estado Islámiko a tuma responsabilidat pa e atake di 14 di yüli. Outoridat franses a bisa ku Bouhlel, un tunesio ku residensia franses a wòrdu inspirá pa propaganda di e grupo ekstremista, pero a agregá ku no a haña prueba pa ku e grupo a organisá e atake aki. Ainda Fransia ta bou di estado di emergensia pa e atake na Nice i e atakenan ku a tuma lugá na Paris aña pasa. E minister di asuntunan Interior Bernard Cazenueve a bisa ku e menasanan kontra Fransia ta mas serio ku nunka. Segun su ofisina, 300 persona a keda detené despues di investigashonnan riba e ret terorista.
