WASHINGTON, AP.- Konseho Permanente di Organisashon di Estadonan Merikano lo reuní djamars pa analisá e situashon na Venezuela apesar ku e pais karibense a pidi pa suspendé e seshon indikando ku e Organisashon a kometé akontesimentunan “grave” i “iregular”.
Embahador Patrick Andrews, kende ta ehersé presidensia rotativo di Konseho Permanente, a bisa djaluna na The Associated Press ku e no a risibí un solisitut formal pa kanselá e seshon.
“E reunion ta planiá ainda”, segun e diplomátiko a indiká den un oudiensia organisá na Caracas. Sin embargo, e embahador venezolano Carmen Velasquez, a bisa na AP ku su delegashon a pidi suspenshon di e reunion djamars, indikando ku tin”posibilidat pa atendé e tema di Venezuela sin akontesimentu debí na e Estado venezolano”.
E kansier venezolano Delcy Rodriguez a bisa na periodistanan: “nos a aktivá tur mekanismo pa buska suspenshon pero nos no a haña un kontesta formal”.
Estado Venezolano lo aktua ku severidat si e seshon no para.
Durante su diskurso di un ora, Rodriguez a lansa un serie di insulto kontra sekretario general di OEA, Luis Almagro, kende tabata sinta nèt na su banda. Almagro no a duna kontesta.
Un total di 14 estado miembro di OEA a yama Venezuela siman pasa pa liberá e prezunan polítiko, organisá elekshon i respetá e desishonnan di Asamblea Nashonal. Sin embargo, e paisnan a bisa ku suspenshon di e nashon di e organismo aki mester bira e último opshon.
