ATLANTA.- Algu mas lat ku 7 or djanochi èks presidente Donald Trump a yega den su avion privá i trapa pia na Atlanta, Georgia, ayera pa despues den un karavana impreshonante e bai pa Fulton County Jail, unda ofisialmente el a entregá su mes. Henter dia ayera komunidat i spesialmente merikanonan tabata den espektativa pa entrega di Trump. Por sierto esaki tabata di kuater aresto ofisial di Trump.
Pafó di e prizòn tabatin un kantidat di simpatisante Republikano ku bandera merikano ta grita pe.
Manera ta konosí, e èks presidente di 77 aña ta ser akusá di diferente tipo di akto froudulento, ku el a konspirá huntu ku otronan den intento pa por a kambia resultado di elekshon na 2020 pa e por a keda sinta den Kas Blanku. Huntu kuné tin 18 otro persona akusá di a koperá kuné den un òf otro dje aktonan froudulento.
Despues ku su tim di abogado a negoshá ku outoridatnan hudisial, a stipulá un fiansa di $200.000 pa Trump. Loke te na último momentu tabata punto di negosiashon ta e notorio foto komo detenido (mug shot) ku tur hende ku drenta e prizòn aki tin di ser someté na dje.
Ekspertonan ta kalkulá ku e proseso kompleto kontra Trump i su aliadonan lo bai dura bastante largu. E intenshon ta pa start na luna di òktober 2023.
