PORT-AU-PRINCE, AP.- E gruponan di oposishon mas grandi di Haiti a uni den un kampaña pa purba destituí presidente Jovenel Moise, ku tin sosten di Merka, organisando protestanan na nivel nashonal kual su ophetivo ta pa paralisá e pais desde awe.
Vários konfrontashon entre manifestantenan i polis a kousa morto i siere di negoshinan durante dia, dañando e ekonomia seriamente kual ya ta sufri di un inflashon demasiado haltu.
E promé minister resien nombra, Jean Michel Lapin a bisa ku gobièrnu ta sostené manifestashonnan pasífiko, pero ku lo no permití violensia riba kaya.
“Nos rumannan ta protestá pa un mihó bida, mihó edukashon, atenshon médiko i trabou. Nos ta motivá nan pa hasi esaki i respetá lei”, asina Lapin a bisa na prensa.
E Komishon Interamerikano di Derechi Humano a reportá luna pasa ku 26 persona a muri i 77 a resultá heridá den tres siman di protesta i violensia relashoná ku esakinan.
E legislador Andy Levin, demókrata di Michigan i miembro di Komité di Asuntunan Eksterior di Kámara di Representante di Merka, inkluyendo representante Barbara Lee, demókrata di California, a ekspresá nan preokupashon pa e violensia den un karta dirigí na sekretario di Estado, Mike Pence.
Haiti tambe a uni e gobièrnu di presidente Donald Trump pa kita presidente venezolano, Nicolás Maduro for di su puesto.
Haiti a respaldá Venezuela den foronan regional a lo largo di vários aña i a risibí miónes di dòler na petroli supsidiá pa e gobièrnu sosialista. Haiti ta rekonosé e lider di oposishon, Juan Guaidó komo hefe di e estado venezolano.
