CARACAS, VENEZUELA, AP.- Vários míles opositor a marcha djaluna den Caracas i shete siudat mas den e pais pa asina preshoná realisashon di elekshonnan regional i logra un salida severo di krísis ku e pais suramerikano ta aden.
Ku bòrchinan bisando “elekshon awor”, míles opositor, kargando bandera venezolano i di diferente partido, a marcha riba algun kaya na ost i wèst di e kapital. E protesta a wòrdu blòkia pa un kaya na nort di Caracas pa sentenar di polis, ku ekiponan antimotin, kende a forma un muraya humano pa impedí avanse di e manifestantenan direkshon di sede di Konseho Nashonal Elektoral, den sentro di e siudat.
Despues di mas di un ora di forsegeo ku polis, opositornan a retirá pasifikamentu di e sitio despues ku un grupo di dirigente a entrega un di e direktornan di CNE un dokumento eksihiendo definishon di un kronogramo elektoral pa e aña aki.
Dirigente opositor Henrique Capriles a rechasá e instalashon di polis i militarnan den Caracas i otro siudatnan paden. El a sostené ku e akshonnan aki ta revelá “teror” ku presidente Nicolas Maduro i su kópula tin.
Ounke e marcha di djaluna tabata masivo, e asistensia tabata muchu ménos di loke a reportá den protestanan di aña pasa na fabor di un proseso di referèndem revokatorio di mandato di Maduro.
