WASHINGTON, AP.- E aktivistanan na fabor di restrikshonnan migratorio a elogiá kanselashon di DACA, i a señalá ku kualkier esfuerso pa salba esaki mester ta vinkulá ku medidanan nobo pa restringí yegada di inmigrantenan.
E direktor ehekutivo di Sentro di Estudio di Inmigrashon, Mark Krikorian, a bisa ku e ta na fabor di mantené DACA, si e inkluí un rekerimentu pa empleadonan verifiká e status migratorio di kualkier persona ku nan kontratá, di forma eléktriko. Ademas, el a señalá ku tur benefisiario mester wòrdu prohibí di haña status legal pa nan famianan i ku e programa no por resultá den un oumento den e total di “green card”, e tarhetanan di residensia permanente.
Dan Stein, di Federashon pa un Reforma Migratorio Merikano, a bisa ku DACA ta”un abusu inkonstitushonal di outoridat ehekutivo” i a señalá ku awor Kongreso tin poder di mantené vigente komo parti di un pakete mas ekstenso ku por inkluí muraya na frontera, mas restrikshon na inmigrashon legal i oumento di esfuerso di deportashon.
E sekretario di Hustisia Jeff Sessions a bisa djamars ku gobièrnu lo stòp di aseptá solisitutnan nobo pa inskribí den e programa. E Kongreso lo tin seis luna pa aprobá un vershon nobo promé ku outoridat stòp di renobá e pèrmitnan di trabou.
