SAO PAULO, AP.- Un tribunal brasilero a ordená pa aktivonan di eks presidente Dilma Rousseff wòrdu kongelá relashoná ku e pèrdida di 580 mion dòler den Petrobras debí na atkisishon di un refineria na Texas.
Outoridat a duna òrdu pa kongelá aktivonan di un eks direktor di e kompania i tres integrante di su hunta direktivo.
Hues Vital do Rego a bisa ku tin indikashon di “mal atministrashon intenshonal ku intenshon di enkubrí e iregularidatnan”. E konhelashon di un aña ta pa asina purba rekuperá e pèrdidanan.
Rousseff tabata presidente di e hunta na momentu ku kompra di e refineria a start den siudat di Texas, Pasadena na aña 2006. El a emití un komunikado afirmando ku “no tin evidensia di aktonan ilegal” i ku e lo apelá.
Aña pasa Rousseff mester a paresé dilanti un huisio polítiko. Asina el a wòrdu destituí di presidensia di Brasil pa violá normanan di e atministrashon fiskal.
