DRYDEN, MOCHIGAN, MERKA, AP.-
Un organisashon chikitu yamá Opus Bono Sacerdotii a operá for di edifisionan diskreto na Michigan, ofresiendo plaka, refugio, transporte, yudansa legal i otro forma di yudansa na kisas míles di saserdote katóliko akusá di kometé e delito di abusu seksual.
Lidernan katóliko ta afirmá ku iglesia no tin ningun relashon ofisial ku e grupo aki. Pero Opus Bono a logra forma un ret konosí den e herarkia eklesiástiko.
Opus Bono a inkorporá e tres saserdotenan akusá ku abusu seksual komo empleado òf asesor. Aparte di esaki, e organisashon a haña sosten di figuranan katóliko romano influyente, inkluyendo esaki di pastor Richard John Neahaus, editor di un publikashon katóliko konservador ku tabata asesor ekstraofisial di presidente George W. Bush, i kardinal Avery Duller, yu di un eks sekretario di estado. Dulles ta un teólogo katóliko konservador prominente.
Opus Bono a uni algun organisashon katóliko konservador indikando ku e skandal kousa pa e abusunan aki ta wòrdu eksaherá pa prensa i abogadonan. E gruponan aki ta bisa ku e skandal ta difamá saserdotenan i ta perhudiká e fe katóliko.
Dos fundadó di e organisashon, Joe Mahe i Peter Ferrara a wòrdu obligá pa retirá despues ku un prokurador general di Michigan a komprobá ku Opus Bono a malversá fondo públiko i gaña kontribuyentenan. Un di tres kofundadó, Eduardo Perrone, a wòrdu retirá abruptamente despues ku AP a kuminsá hasi pregunta tokante indikashonnan ku el a abusá seksualmente di un menor di edat algun dékada pasa. Perrone ta ninga e denunsia aki.
