PUNTA GORDA, MERKA, AFP.- Orkan Ian ta yega kosta sùitwèst di Florida komo un orkan di kategoria 4, ku bientu i áwaseru fuerte ku un menasa “katastrófiko” di daño i inundashon.
Sentro Nashonal di Orkan (NHC) a bisa ku e wowo di e orkan “ekstremadamente peligroso” a subi tera despues di 3 or di atardi na wèst di siudat di Fort Myers.
Imágennan na televishon di siudat Naples a mustra inundashon di kasnan i kareteranan serka di playa.
NHC a registrá bientu fuerte di 150 kilometer pa ora na momentu ku Ian a subi tera.
Segun pronóstiko, Ian por afektá miónes di persona na Florida i sùitost di Georgia i South Carolina, i tambe víktimanan riba laman.
Alrededor di 2,5 mion persona a haña òrdu pa evakuá den alrededor di diesdos kondado na kosta di Florida, ku desénas di refugio establesé, i tambe evakuashonnan boluntario.
Un dia promé Ian a yega Cuba komo kategoria 3, i a asotá wèst di e pais i interumpí e ret di koriente riba e isla.
Por lo ménos dos persona a muri den provinsia di Pinar del Rio, segun indikashon di medionan estatal kubano.
