WASHINGTON, AP.- E oudiensianan públiko den e investigashon di huisio polítiko kual presidente Donald Trump ta embolbí aden lo kuminsá otro siman, segun indikashon di demókratanan di Kámara di Representante. Funshonarionan di Departamento di Estado lo partisipá, kende ya a testifiká tokante nan preokupashon pa ku e tratonan entre Trump i Ukrania.
E demókrata Adam Schiff, presidente di Komishon di Inteligensia di Kámara di Representante a indiká ku e diplomátiko merikano na Ukrania, William Taylor lo testifiká. Aparte di esaki, e funshonario di Departamento di Estado George Kent i eks embahador di Ukrania, Marie Yovanovitch tambe lo testifiká.
E tres personanan ya a deklará kaba, pero den seshonnan privá den e promé fase di e investigashon.
Trump a duna òrdu pa destituí Yovanovitch. E funshonario a informá na legisladornan ku durante su mandato den e pais europeo el a wòrdu informá ku e mester “kuida su mes” ku tin hendenan ku kier “hasié daño”.
Tantu Kent komo Taylor a testifiká i a papia di e inkietutnan ku nan tabata sinti relashoná ku retiro di e embahador. Trump a ninga ku el a kometé un akto ilegal, pero Schiff a deklará djárason ku e testimonionan ta revelá ku “e echonan mas importante ta básikamente irefutabel”.
