CHARLESTON, AP.- Dylann Roof kende a keda haña kulpabel pa matansa na un misa di hende kolo skur na Charleston a papia ayera pa promé biaha dilanti di hurado durante su huisio di pena kapital, segurando ku e ta bon bon na mente i ku e no ta trata na skonde nada. Kisas e kos di mas importante ta loke Dylan no a bisa esta “Roof no a pidi e huradonan pa e keda libra di pena di morto.
Luna pasa, e hurado a hañ’é kulpabel di manera unánime pa delitonan di intoleransia rasial i otro akusashonnan pa morto tira di 9 miembro di un iglesia históriko di hende kolo skur miéntras su miembronan tabata realisando lès di beibel. E hurado lo disidí awor ku si e ta keda sentensia na bida den prisòn òf e pena máksimo di morto.
“Mi deklarashon inisial kisas ta parse un poko for di lugá”, asina e hóben kolo kla di 22 aña a bisa ku bos masha trankil miéntras e tabata para dilanti di un podio i de bes en kuando tabata mira loke e tabatin riba papel. “Mi no ta bai bisa…..aparte di e echo di ku mi ta konfia den hende ku mi no tin di konfia den dje i e echo ku probablemente mi ta mas mihó pa pone mi mes na bèrgwensa ku kualke otro hende, pero mi no tin nada malu sikologikamente”.
E abogadonan di Roof a indiká ku su kliente a skohe pa representá su mes durante di e fase di sentensia di e huisio pasobra e ta preokupá ku nan lo presentá evidensianan ku lo bergons’e i su famia.
Nan no a bisa kua evidensia esakinan por ta, pero for di zomer pasa nan tabatin planeá di presentá evidensia ku ta bisa ku Roof ta sufri di enfermedat mental. For di e dia ei tabatin hopi konmoshon pa skonde supuestamente informashonnan delikado.
Roof mes a bisa ku e no ta kere den sikologia. Den un karta ku korte a lesa durante di su huisio, Roof a kalifiká e spesialidat komo un invento di hudiu ku no ta hasi nada otro ku no ta inventá enfermedat i bisa hende ku nan tin problema siendo ku nan no tin.
E fiskalnan a bisa ku Roof meresé pena di morto pasobra el a skohe di enfoká riba hendenan vulnerabel durante un estudio bíbliko den e tèmpel Emanuel AME na yüni 2015. Roof a sinta ku miembronan di e iglesia pa sigur 45 minüt i a spera te ora nan a sera nan wowo pa e los tirunan. El a bisa Polly Sheppard un di e miembronan ku a keda bibu ku e ke pa e keda na bida pa e konta mundu dikon el a ataká e iglesia históriko di kolo skur. “El a afirmá “bosnan ta violando nos muhénan i ta tumando nos pais over”.
