WASHINGTON, MERA, AFP.- Outoridat a reportá kasonan hopi inusual di problemanan ku kurason entre adolesentenan i hóbennan adulto vakuna kontra COVID-19 e siman aki, sin ku a establesé un vínkulo ku e vakuna.
Kasonan di “myocarditis”, un inflamashon di e múskulo di kurason, a keda detektá den personanan ku a haña e vakuna desaroyá pa Pfizer/BioNTech òf Moderna, segun registro di Sentro pa Kontrol i Prevenshon di Enfermedat (CDC) di Merka.
Mayoria kaso no ta grave, segun CDC segurando ku lo sigui evaluá e situashon. No tabatin hopi kaso ku a keda reportá i CDC no a publiká nòmber ni edat eksakto di e personanan afektá.
E episodionan a sosodé prinsipalmente entre adolesentenan i hóbennan adulto, kuater dia despues di e inyekshon. Kasonan di ‘myocarditis’ ta sosodé despues di e “segundo inyekshon” i ta afektá prinsipalmente hende hòmber.
Fransia a reportá sinku kaso di ‘myocarditis’ entre personanan ku a haña e vakuna kontra COVID di Pfizer/BioNTech pero no a establesé un vínkulo ku e inyekshonnan.
Merka a amplia outorisashon di vakunashon ku Pfizer/BioNTech pa adolesentenan entre 12 i 15 aña desde 10 di mei último.
