MOSCOW, RUSIA, AFP.- Outoridat di prizòn na Rusia a bisa djaluna ku lo transferí Alexei Navalny pa un hospital den prizòn, despues ku Union Europeo a atvertí ku Moscow ta responsabel pa su estado di salú.
Merka a menasá Rusia ku “konsekuensia” si Navalny muri den prizòn. E ta e oponente mas prominente di presidente Vladimir Putin.
Navalny a lansa un wega di hamber tres siman pasá i su dòkternan privá a atvertí den wikènt ku e por muri na kualkier momento.
Rusia su servisio di prizòn kual a prohibí bishita di Navalny su propio ekipo médiko a bisa ku su dòkternan a disidí ku lo transfirié pa un fasilidat médiko den un otro prizòn serka di Moscow. Outoridat a bisa ku Navalny su kondishon ta “satisfaktorio” i a agregá ku e ta tuma suplementonan di vitamina komo parti di su tratamentu médiko.
