ABU DHABI.- E aña aki e kumbre di 28 pais riba e tema di klima tin un tiki kontroversia rònt di dje, esei pa motibu ku e lo bai tuma lugá den un di e paisnan eksportador di mas grandi pa loke ta petroli, ku ta Emiratonan Arabe Uní, i e lo ser enkabesá pa un dje karanan mas prominente den e industria petrolero.
Ya kaba aktivistanan medioambiental ta bisando ku ta algu froudulento, argumentando ku e debate riba klima awor ta ser sekuestrá dor di produktonan di kombustibel fosil pa asina protehá e agènda di ganashinan máksimo i paisnan produktor di petroli.
E envolvimentu di EAU a fomentá diskushon si enbèrdat lo tin lugá den e espasio di klima pa paisnan ku prinsipalmente ta dependé di eksportashon di kombustibel fosil pa nan entrada.
