SIUDAT DI PANAMA, AFP.- Panama a pidi yudansa internashonal, spesialmente di Merka djaluna, pa atendé ku e ola kresiente di migrantenan ku ta drenta e pais.
“Nos por manehá e migrantenan, pero nos mester di e komunidat internashonal, partikularmente di Merka, pa motibu ku e destinashon final di mayoria migrante ta Merka”, segun indikashon di e kansier panameño, Erika Mouynes, den un rueda di prensa.
Panama no ta haña yudansa di eksterior. Tur yudansa ta sali for di Panama mes i na kuminda so esaki ta 7,2 mion dòler di e presupuesto nashonal, asina Mouynes a splika.
E visepresidente di Merka, Kamala Harris a komprometé na duna sosten ekonómiko pa yuda ku migrantenan ku ta sali for di Honduras, Guatemala i El Salvador rumbo pa Merka.
Sinembargo, e kansier panameño a rekordá ku tin un kantidat haltu di haitianonan ku ta yega frontera di Merka. “E haitianonan aki ta krusa via Panama, i Panama ta akohé nan”.
Segun kalkulashon ofisial, mas di 46.500 migrante, inkluyendo 6.200 mucha a hasi e travesia peligroso aki kaminda nan mester enfrentá gruponan kriminal i animalnan salbahe entre otro. Mayoria migrante ta haitiano, kubano i tambe asiátiko i afrikano.
