Papiamentu a hòrta mi kurason

Kathy Taylor

The Birthing House ta buki skibi pa Kathy Taylor, outor i eskritor ku a hala nos atenshon pa su dominio di papiamentu. Kathy ta eskritor i músiko i ta profesor di Spaña (Penshoná). El a biba na Mexico, Nicaragua, Irlanda, Kòrsou i Alemania i a publiká bukinan di poesia, historianan kòrtiku, tradukshonnan, novela bilingual riba taksista na Mexico i teoria literario. Kathy ta fasiná ku Kòrsou i p’esei mes su bon dominio di papiamentu. Den kombersashon ku Djasabra el a konta su historia i tambe The Birthing House, ku ta su último publikashon.

Kathy a nase i ta biba na Merka i ta papia papiamentu ku fasilidat. El a duna kurso di papiamentu na Earlham College Indiana di 2003 pa 2014. Banda di hopi otro buki, Kathy a produsí tambe un tomo di poesia i kantika.

Duna lès di papiamentu

“Mi kiersa ku den mi bida anterior mi tabata yu di Kòrsou”, asina Kathy a kuminsá bisa nos. The Birthing House ta un novela ku a gana premio internashonal. Kathy tabata profesor di Spañó. El a studia esei i a trahe na Merka i diferente parti di Mundu. E tabata profesor na un universidat chikí na Indiana. E ta gusta idioma, e tin un pashon pa idioma. E tabata duna lès di lingwista na Spañó. Kathy ta kòrda e tabatin dos kolega franses ku tabata duna kreol entre otro di Haiti. Kathy tambe kier a duna algu den e direkshon ei. E ta kòrda ku den un teksto el a tuma nota entre otro di papiamentu ku tin basta hende ta papi’e. El a yega di tende di Aruba, Boneiru i Kòrsou i el a hasi investigashon i Kòrsou tabata parse ménos turístiko. Ora el a yega aki e no tabatin idea unda e ta keda pero aki a konosé un grupo internashonal Servas ku ta hende ku ta kompartí kultura ku otro. Por apliká despues i nan ta duna buki di e pais konserní. El a haña uni di Kòrsou, Boneiru i Aruba huntu. Ora el a yega Kòrsou e promé persona ku el a keda presentá na dje ta Nydia Ecury, por sierto na un supermerkado. Despues tambe el a konosé Frank Martinus. Kathy a sigui studia entre otro riba su mes pa e sa mas di e papiamentu. Nunka el a tende e papiamentu papia i ora el a yega aki el a hañ’e similar ku spañó i tambe portugues.

Trese studiantenan Kòrsou

Poko poko Kathy a sigui studia i a disidí ku e kier a krea un kurso chikí pa studiantenan di idioma na Merka. E tabata duna kada dos aña, duna un semèster di papiamentu. Tambe el a kuminsá ku un programa kòrtiku kaminda e tabata bin ku studiantenan Kòrsou. Asina el a sera mas ku e papiamentu i su historia. E tabata siña e studiantenan i siendo hendenan ku no tabata papia papiamentu, nan a siña papia e papiamentu bon. No tabata solamente merikanonan, pero tambe studiantenan internashonal.

Konekshon

Pa loke ta papiamentu, el a bisa Djasabra ku Papiamentu a hòrta su kurason. E ta haña e papiamentu manera poesia. E ta musikal. I komo e ta papia otro idioma kaba manera aleman, spañó i portugues el a haña papiamentu manera un idioma den su selebre tur meskla. E papiamentu a bai fásil pe i el a sinti un konekshon kuné.

The Birthing House

Esaki ta e di sinku buki ku Kathy ta skibi. E promé tabata un buki akadémiko literario pa su disertashon, despues el a skibi un novela na Mexico ku resultado di kombersashon ku taksistanan, despues a sigui un buki di poesia ku el a publiká aki na Kòrsou i tabata bilingwe i na papiamentu i ingles, i despues un buki di kuenta kòrtiku na ingles pero ku a tuma lugá na Mexico i Nicaragua i migrantenan na Merka. I awor tin The Birthing House ku a gana premio internashonal Firebird Book Award i tambe ta finalista pa otro premio American Writing Awards i tur dos den e kategoria di fikshon multikultural. The Birthing House ta novela basá riba Kathy su eksperensia ora el a biba na Alemania ku su kasá i su yu hòmber di 6 aña. E ta un fikshon. E ta un buki ku ta bai profundo. E ta un buki riba skibimentu mes, memoria i komunidat. Kon ta haña bo kas i bo mes den un otro kultura. Tambe e importansia di skibimentu pa komprondé, konosé i sana bo mes i e protagonista prinsipal Clare. Tin dos tempu separá di otro den e buki. Promé Clare a pèrdè barika i ta kuminsá ku e doló di e pèrdida di su yu ei, e doló di ousensia. 20 aña despues e ta yega ku su kasá i yunan grandi kaba i el a pèrdè su tata stimá ku ta kaba di fayesé. E skibimentu pe ta un manera di prosesá tur kos, pa komprondé i sana su mes. Na un banda e proseso di pèrdè barika i e di dos pèrdè su tata pero poko poko Clare ta sana ku e sanamentu di skibimentu.

Skibi ta un sanashon

Skibimentu ta un tipo di terapia pa sanashon. Den e di dos tempu den e buki Clare no por a skibi e buki akadémiko ku e mester a skibi. E tabata bashí paden i ta papia di un bashí grandi ku ta yena su ser. Pero poko poko e ta kuminsá skibi den diario kosnan íntimo i ta komuniká ku otro i ta manda e-mail i karta. Hopi kombersashon ku su kasa i ta konosé hopi hende i forma amistat ku hendenan di otro kultura. I despues e por a skibi su buki, esta Clare,. Esaki ta nifiká ku skibimentu ta un terapia pa sanashon.

Mas buki premiá

Esaki no ta promé buki di Kathy ku ta haña  rekonosementu. El a menshoná pa nos e buki di kuentanan kòrtiku titulá Trees and Other witnesses ku a sali finalista den kategoria di fikshon literario.

Siña papiamentu grátis

I kiko mas por spera di papiamentu serka Kathy. El a bisa ku a hopi aña el a traha riba un kurso di papiamentu. Promé el a reuní material pa universidat. Hopi hende na Kòrsou  a duna buki di poesia i historia di Kòrsou i poko poko el a krea un kurso pa su studiantenan. Pero el a disidí di desaroyá un vershon riba Black Board pa haña hende riba Internet ku por siña papiamentu grátis. Despues di hopi aña Black Board a pèrdè i a bai un sistema nobo. Pero despues ora Kathy a bin Kòrsou  den un di e biahanan ei el a papia ku hendenan di universidat i papia ku biblioteka digital i nan a papia di start atrobe. Poko poko a traha riba un vershon nobo mas interaktivo. E ta riba un plataforma di Hulanda. El a buska finansiamentu i ta buska hende mas hóben pa sigui kuné.

Nos tur ta eskritor

Kathy ta enkurashá tur hende pa skibi. E no mester ta profeshonal, pero e ta un manera bon pa bira kreativo. E kreatividat bo no tin di sa presis kiko bo ta bai skibi i bisa pero e ta sali di bo. E protagonista di e buki esta Clare ta papia na un foro di postgrado di skibimentu i outornan di futuro. E ta bisa na e okashon ei “nos tur ta eskritornan, no solamente nos ku ta bisa ku nos ta, pero nos tur. Kada momentu di nos eksistensia ta un pida historia ku ta biba den nos i ta konektá nos”.

https://youtu.be/TCGuRnGohKA