Parlamento suiso a rechasá un proposishon djaweps, kual ta outorisá transferensia di armanan di fabrikashon suiso pa Ukrania.
E votamentu a tuma lugá despues ku Presidente suiso, Alain Berset, a reuní ku e presidente Ukraniano, Volodymyr Zelensky, durante e kumbre di Komunidat Polítiko Europeo na Moldavia, unda nan a diskutí eksportashon di ekiponan béliko.
Konseho Nashonal a vota na Berna, ku 98-75 kontra e inisiativa parlamentario presentá pa un komité.
Jean-Luc Addor, populista i derechista di Partido di pueblo suiso, esun di mas grandi den Konseho Nashonal, a bisa ku si e proposishon wòrdu aprobá, Suisa lo “komprometé ku un di e protagonistanan (di e guera) i dor di esei violá e pais su neutralidat”.
Suisa tin un tradishon largu di neutralidat militar. E pais di 8,8 mion di habitante tin un ehérsito bon armá i ku ta reklutá hòmbernan obligatoriamente.
E tradishon suiso di neutralidat a wòrdu debatí fuertemente desde inisio di e invashon ruso na Ukrania den febrüari 2022.
E pais Alpino, ku no ta forma parti di Union Europeo, a adaptá sanshonnan kontra Moscow, pero no a mustra e mesun fleksibilidat relashoná ku transferensianan militar.
Te ainda a rechasá petishonnan eksplísito di Alemania, Spaña i Dinamarka pa bolbe eksportá arma pa Ukrania ku ta bini di e paisnan aki.
