LOS ANGELES, USA (AFP).- FBI a informá pasaheronan ku tabata den e avion Boeing di Alaska Airlines, ku a sufri un fayo den pleno buelo, ku nan por ta víktima di un krímen.
Departamento di Hustisia di Merka a anunsiá na kuminsamentu di luna ku ta hasi un investigashon kriminal riba e insidente kasi katastrófiko di 5 di yanüari, ora ku porta blòkiá di un avion a lòs i kai durante di pleno buelo.
Ningun hende a resultá gravemente heridá, pero e avion 737 MAX 9 mester a hasi un aterisahe di emergensia. Imágennan dje insidente a mustra pasaheronan morto spantá sintá banda dje buraku grandi ku a surgi ora ku e porta a lòs. E porta a kai riba patio di un kas.
Despues dje insidente, otro avionnan di e mesun modèl mester a keda tera pa algun dia, loke a trese kuné ku míles di buelo a keda kanselá.
“Komo spesialista di e unidat di víktimanan di divishon di Seattle, mi ta drenta den kontakto pasobra nos a identifiká ku bo por a bira víktima di un krímen”, segun FBI den karta dirigí na pasaheronan, segun e korant Seattle Times. Nan ta bisa mas aleu ku “FBI ta investigando e kaso”.
“Un investigashon kriminal por tuma su tempu, i pa vários motibu nos no por bisa nada mas na e momento aki”.
E investigadónan federal a bisa ku tabata falta algun skruf ku mester a sigurá e porta.
Boeing, e gigante di aviashon a risibí hopi krítika pa motibu ku a tarda ku investigashon, te asta ku Hunta Nashonal di Seguridat den Transporte a bisa na kuminsamentu di mart di no a risibí dokumentonan klave òf nòmber di empleadonan di Boeing ku a traha riba e parti spesífiko.
“Nos no tin registro. No tin nòmber dje 25 personanan enkargá ku e trabou aki den e sentronan di operashon”, segun Jennifer Homendy, hefe dje grupo enkargá ku e investigashon, a bisa na senadornan norteamerikano.
“Ta inkreibel ku despues di dos luna, ainda no tin e detayenan aki”, el a agregá.
