BERLIN, ALEMANIA, AFP.- Na momentu ku e periodista ruso Marina Ovsyannikova a interumpí un programa bibu di televishon di su pais pa kritiká e guera na Ukrania, el a spera un reakshon negativo di Rusia sin duda, pero no di e sobrá parti di mundu tambe.
Tres luna despues, Ovsyannikova, di 43 aña, ta biba den eksilio i tin miedu di regresá Rusia pa motibu ku e por bai prizòn.
Pero na mes momentu e ta enfrentá un hostilidat kresiente na Ukrania i Oksidente. Su krítikonan a akus’é di servisio di propaganda di Rusia.
“E situashon ta realmente apsurdo, paso Rusia ke priva mi di siudadania i enkarselá mi, i outoridatnan ukraniano ke prohibí mi di drenta e pais dor ku mi ta un èks propagandista” di Moscow, segun indikashon di Ovsyannikova, yu di un mama ruso i un tata ukraniano.
Den mart, algun dia despues di e invashon di Rusia den Ukrania, el a interumpí un programa informativo bibu di e kadena Pervy Kanal, ku un bòrchi ku “No War” skibi ariba.
