SACRAMENTO, MERKA, AP.- Polis di Sacramento a detené un hòmber di 56 aña komo sospechoso di asesinato, en konekshon ku asesinato di dos adulto i dos menor kometé un dia promé den e siudat.
Salvador Vasquez-Oliva a wòrdu detené djaweps na San Francisco, 142 kilometer di Sacramento. E sospechoso tabata den prizòn den Sacramento, segun informashon di polis, sargento Bryce Heinlein.
Kuater víktima a wòrdu deskubrí djaweps mainta, na momento ku polis a drenta den e kas despues ku un pariente a indiká ku tin algu robes andando.
Polis no a identifiká e víktimanan inmediatamente ni e no a duna mas detaye di nan. El a agregá ku ainda nan no a establesé motibu di e asesinatonan.
Investigadornan a identifiká Vasquez-Oliva inmediatamente. Sin embargo, polis no a bisa ki relashon Vasquez tabatin ku e víktimanan. Vasquez probablemente tabata konosé e víktimanan, segun e bosero di polis.
No tabata evidente na ki momento e víktimanan a wòrdu asesiná, segun e bosero di polis. Outoridat tampoko a bisa kon nan a wòrdu asesiná.
No tabatin indikashon di tiru ni otro problema den e kas, segun Heinlein a indiká.
