TEGUCIGALPA (AFP).- Ministerio Públiko di Honduras a pidi pa konfiská 131 propiedat “di orígen ilísito” dje eks-presidente Juan Orlando Hernandez, 10 dia despues ku el a keda deklará kulpabel di narkotráfiko den un kaso históriko na Merka.
E fiskalnan a yega na desishon ku mester konfiská 131 propiedat di eks-presidente Juan Orlando Hernandez Alvarado i su kasá Ana Rosalinda Garcia Carias pa motibu ku nan a keda atkerí di forma ilegal. El a detayá ku ta trata di 32 tereno i kas, 19 negoshi i 80 produkto finansiero (kuentanan bankario òf depósito).
Hustisia for di aprel di 2022 a ordená pa pone nan bou di un tipo di embargo, na momento ku Hernandez a keda ekstraditá pa Merka, dos luna despues di a baha komo presidente.
Mas aleu fiskal a menshoná entre otro personanan yegá na e eks-presidente, su mama Maria Elvira Alvarado, su rumannan Aixa Marlene, Amílcar, Juan Antonio (kondená pa narkotráfiko na Merka den 2021) i Hilda (kende a muri den 2021 den aksidente di helikòpter).
Den un komunikado e famia a sigurá ku su ekipo di defensa “a bin ta prepará tur informashon nesesario pa akreditá e orígen i hustifikashon kon nan a yega na e propiedatnan”.
Dia 8 di mart, un tribunal federal di New York a deklará Hernandez kulpabel di narkotráfiko i tráfiko di arma, na final di un kaso ku por hib’é na kastigu di bida largu den prizòn. Su kondena lo keda anunsiá dia 26 di yüni.
Segun fiskal, un grupo ku tabata konta ku protekshon dje presidente (2014-2022) lo a manda mas di 500 tòn di kokaina Merka. A kambio, Hernandez lo a risibí miónes di dollar dje kartelnan di droga, entre otro esun di Sinaloa, dje narkotrafikante mehikano Joaquin “Chapo” Guzman, kondená na bida largu na Merka.
Siman pasá, un husgado militar hondureño a ordená aresto di e dos generalnan ku a testiguá na defensa dje eks-presidente, despues ku nan a biaha pa New York sin pidi pèrmit di ehérsito di Honduras.
Despues dje kaso, e kasá di Hernandez a anunsiá su intenshon di buska e presidensia di Honduras den 2025 komo kandidata dje opositor Partido Nacional, e formashon derechista ku a hiba su kasá na poder.
