PORT-AU-PRINCE (AFP).- E gèngnan ku ta kontrolá Port-Au-Prince den último oranan di ayera a ataká Petion-Ville, un dje zonanan mas riku dje kapital, kaminda por lo ménos 14 kadaver a aparesé ayera mainta. Te na e momento ei no tabata konosí e sirkunstansianan bou di kua e personanan a fayesé.
For di den oranan di mainta hòmbernan armá tabata sembra teror den Laboule i Thomassin, dos bario di Pétion-Ville kaminda nan a ataká un banko, un stashon di gasolin i vários kas privá, segun bisiñanan a indiká na AFP. Entre e kasnan ku nan a drenta ta figurá esun di un hues di tribunal haitiano, Pierre Volmar Demesyeux, ku por a skapa for di su kas danki na intervenshon di polis.
E pais karibense ta sufri un ola di violensia for di kuminsamentu dje luna’ki, ora ku vários gèng a sera kabes pa asaltá lugánan stratégiko di e kapital den un pelea kontra e promé minister Ariel Henry.
E dirigente, kuestioná tantu na Haiti komo pa e komunidat internashonal, un siman pasá for di Pto. Rico a anunsiá su retiro i lansamentu di un konseho presidensial di transishon.
Merka ayera a ekspresá su speransa ku e organisashon nobo di gobièrnu lo ta kla “mas lihé posibel” djaluna (ayera) mes.
“M’a komprondé ku e partinan interesá di Haiti ta hopi serka pa keda kla ku e manera pa forma gobièrnu”, segun e funshonario merikano Vedant Patel.
Speransa ku e transishon polítiko lo avansá, Haiti ta sufri un inseguridat permanente. Kenia, ku a primintí di manda polis pa liderá un mishon internashonal di seguridat supervisá pa ONU, a suspendé su intervenshon te ora ku e outoridatnan nobo tuma asiento.
