LOS ANGELES, USA (AFP).- Un dokumental lansá ayera ta sigui e konsekuensia dje enkuentro kòrtiku ku Stormy Daniels, un dje mas famoso streanan di sine pa adulto, lo tabatin ku Donald Trump den 2006, mirá for di perspektiva dje artista.
E produkshon a yega e plataforma di Peacock apénas algun siman promé ku e eks-presidente bai Korte pa motibu ku supuestamente el a skonde e pagonan pa soborná e aktris porno, un dje vários kasonan ku e pre-kandidato dje partido republikano ta enfrentá den e esfera kriminal.
E dokumental ta basá riba entrevistanan i imágennan kontemporáneo pa konta kiko a pasa ora ku e ekipo di Trump a purba na skonde e supuesto relashon miéntras ku e tabata den kampaña pa White House, pagando e strea 130.000 dollar.
E dokumental ta detayá kon Daniels a bira famoso ku e skandal ei, yegando na atraé multitutnan den su gira di strips, i kon e fama i e atenshon di prensa tambe a afektá su bida familiar.
Ku e kaso na kaminda, fiskalnan ta bisa ku e magnate a enkubrí di forma ilegal un skema di pago na Daniels, envolviendo su ayudante Michael Cohen pa e pagonan na e strea p’asina skonde detayenan dje supuesto relashon.
Un oudiensia di 25 di mart na New York lo determiná e fecha dje kaso. Trump, kende ta nenga e akusashonnan, ta enfrentá kuater kaso kriminal na momento ku e ta den kampaña pa regresá White House. Su team legal, miéntras tantu, ta hasiendo esfuerso pa hala fecha di tur e kasonan pa te despues di votashon presidensial di 5 di novèmber.
