WASHINGTON, AP.- E gobièrnu di presidente Donald Trump a habri kaminda pa seguronan bende plannan di salú riba término kòrtiku komo un alternativa mas barata kompará ku e plan di Obama. E primanan aki ta demasiado karu pa algun usuario.
E plannan nobo no ta obligá pa kubri problemanan di salú preeksistente i nan benefisionan ta limitá. Esaki ta nifiká ku kisas esakinan no ta atraktivo pa un gran parti di konsumidónan ku mester di un pólisa individual.
“Pa mayoria di esnan ku ta sufri di problemanan preeksistente òf esnan ku tin otro problemanan di salú, e plan di Obamacare ta mihó pa nan”, asina e sekretario di Salú, Alex Azar a indiká den e programa Fox & Friends. “Nos ta simplemente brinda mas opshon.
Fuentenan ofisial ta bisa ku e plannan por dura 12 luna i ta renovabel pa 36 mas. Pero e gobièrnu federal no ta garantisá su renobashon. E plannan ta bini ku e aklarashon ku esaki no ta satisfasé e rekisitonan ni salbaguardiá e Lei di Kuido di Salú Aksesibel (ACA), konosí popularmente komo Obamacare.
Debí na e imposibilidat di eliminá gran parti di e lei di Obama, e gobièrnu di Trump a buska un forma pa hasi esaki irelevante i krea opshonnan pa e pueblo ku debí esaki su entrada no por haña supsidio di ACA.
