NEW YORK, MERKA, AFP.- Polis a detené e sospechoso di tiroteo den metro di New York ku a laga 23 hende herida, 10 di nan ku bala, djamars, asina outoridatnan a informá. “Nos a logra gar’é”, asina e alkalde di New York Eric Adams a bisa den un rueda di prensa kaminda a anunsiá e aresto.
Polis a identifiká e hòmber komo Frank James, un afroamerikano di 62 aña. El a aktivá dos granada di huma den e wagòn ku tabata yegando e stashon di 36 Street na Brooklyn den oranan di mainta djamars, promé di a los 33 tiru kontra e pasaheronan.
James a keda detené ora e tabata kana den un kaya di Manhattan, asina e hefe di polis di New York Keechant Sewell a bisa. E aresto a sosodé sin insidente i e hòmber lo keda akusá di e tiroteo di djamars.
