LONDON, AP.- Polis di London a kuminsá usa sistemanan ku kámara pa rekonosé kara di esnan fugitivo. E teknologia aki a kousa preokupashon pa e oumento den vigilansia i violashon di privasidat.
Polis a instalá e kámaranan aki riba un trùk blou di polis pa monitòr esnan ku sali for di e sentro komersial na Startford, na ost di London. Agentenan den serkania tabata splika kon e sistema aki ta funshoná.
Ta promé biaha ku polis metropolitano di London ta usa e kámaranan aki despues di un serie di training aña pasá.
Gruponan defensor di derechi humano, legisladornan i ekspertonan independiente a denunsiá e sistema indikando ku esaki ta evadí privasidat di e pueblo. Aktivistanan a ekspresá preokupashon pa un posibel vigilansia mas amplio.
Gran Bretaña ta defendé libertat sivil i no ta permití polis pa para niun hende di forma arbitrario pa kontrolá riba kaya. E teknologia aki ta kontradesí tur esaki, asina Silkie Carlo a bisa, kende ta direktor di e grupo defensor di Privasidat Big Brother Watch.
