BERLIN, AP.- E polítiko enkargá ku finansa den un region importante di Alemania a wòrdu deskubrí morto. Agentenan a indiká ku ta trata di un posibel kaso di suisidio.
Thomas Schaefer, di 54 aña i minister di finansa den region di Hesse, kual ta inkluí Frankfurt a wòrdu deskubrí sin bida riba riel na Hochheim, serka di Frankfurt. E tabata forma parti di Union Kristian Demókrata di kansier Angela Merkel.
Polis a indiká ku e sirkunstansianan na e sitio i deklarashon di testigu ta indiká ku a trata di un suisidio. E gobernador Volker Bouffier a deklará ku Schaefer a kometé suisidio dor ku e tabata sumamente deprimí debí na e krísis ku e Coronavirus a okashoná.
Schaefer tabata “sumamente preokupá ku e no por kumpli ku e espektativanan di su pueblo durante e krísis, partikularmente relashoná ku e aspekto finansiero”.
E gobièrnunan regional i federal di Alemania a elaborá paketenan enorme di yudansa finansiero pa kompensá e dañonan ekonómiko kousá pa e pandemia.