RIO DE JANEIRO, BRAZIL (AFP).- Polis di Brasil a rekomendá pa prosesá Jair Bolsonaro pa falsifikashon di sertifikadonan di vakunashon kontra di covid-19, inkluyendo esun di su mes i di su yu, den un kaso ku ta oumentá e preshon hudisial kontra dje eks-presidente.
Bolsonaro i otro 16 persona a keda impliká den un kaso di a emití “sertifikadonan falsu, ku intenshon di saka bentaha indebí dor di hasi chèrchi di medidanan sanitario” durante dje pandemia, segun e dokumento di Polis Federal.
E eks-presidente, kende nunka a duna importansia na covid, a rekonosé públikamente ku e no a bakuná.
Polis ta referí na e delitonan di “asosiashon kriminal” i “hinkamentu di datonan falsu den e sistema públiko”, ámbos pa kua tin kastigu di prizòn.
E susesonan a tuma lugá entre novèmber 2021 i desèmber di 2022, segun e informe di 231 página, ku a keda emití na Supremo Tribunal Federal. Hustisia lo disidí si ta formalisá e akusashon.
Fabio Wajngarten, abogado di Bolsonaro, a kalifiká komo “apsurdo” e puntonan tres’é dilanti. “Miéntras e tabata presidente, e no tabata obligá di presentá ningun tipo di sertifikado pa su biahenan. E kos aki ta un persekushon polítiko i un intento pa mancha e bida polítiko di Bolsonaro”, segun e abogado a skibi riba ret sosial.
E eks-mandatario den mei último a deklará na polis relashoná ku e kaso aki. A hasi investigashon den su kas buskando pruebanan. Na e okashon ei el a nenga e akusashonnan i a bisa ku outoridatnan tabata buska manera pa fabriká un kaso kontra di su persona.
