POR-AU-PRINCE (AFP).- Un atake kontra di banko sentral di Haiti na Port-Au-Prince, e kapital kontrolá pa gran parti dor di gèngnan armá, a frakasá i vários atrakadó a muri, segun un fuente di gobièrnu a deklará na AFP.
Banko di Repúblika di Haiti ta un dje poko institushonnan ku no a hui for di sentro di siudat, kaminda vários gèng ta disidí loke ku ta tuma lugá. Un dje gèngnan djaluna a ataká e banko pero nan intento a frakasá.
“Nos agentenan di seguridat, huntu ku polis i Ehérsito, a enfrentá e atake. Entre tres i kuater atrakadó a muri”, segun un fuente a deklará. Tambe un dje guardianan di seguridat a keda heridá pa un tiru.
Port-Au-Prince, golpiá diariamente pa violensia di gèngnan, ta sufri black-out den vários zona. E kompania di koriente a splika den un komunikado ku e kaimentu afó di koriente ta debí na robo di materialnan di parti di e gèngnan den kuater di su supstashonnan den e kapital.
Haiti, ku tabata biba den un profundo krísis polítiko i i di seguridat, awor ta den un episodio nobo di violensia for di kuminsamentu dje luna’ki, ora ku vários gèng a uni forsa pa ataká lugánan stratégiko di Port-Au-Prince den un bataya kontra dje promé minister Ariel Henry.
Henry, hopi kuestioná na su pais i den estranhero, no por a regresá Haiti despues di un biaha pa Kenia, i a anunsiá su retiro dia 11 di mart.
E mester keda sustituí pa un konseho presidensial di transishon, formá pa shete miembro repartí entre e prinsipal forsanan polítiko i sektor privá. Pero e kombersashon pa krea e grupo a keda retrasá pa motibu di desakuerdonan.
Mientrastantu, violensia rònt e pais pero prinsipalmente na Port-Au-Prince, a krese i bira algu espantoso i no mas ku ayera a topa 14 kurpa sin bida den un bario luho di Port-Au-Prince, kaminda miembronan di gèng durante di hinter e anochi tabata hòrta.
