MOSKU, RUSIA (AFP).- Sigur 40 hende a muri i mas ku shen a resultá heridá den un tiroteo siguí pa kandela den un sala di konsierto di Mòsku, atribuí pa outoridatnan ruso komo un “sangriente atentado terorista”.
“E balanse provisorio dje atentado den e kompleho Crocus City Hall ta di 40 morto i mas di shen hende heridá”, segun forsanan di seguridat (FSB).
“Komunidat internashonal mester kondená e krímen odioso aki”, segun Maria Zajarova, bosero dje Ministerio ruso di relashonnan Eksterior.
E alkalde di Mòsku, Serguei Sobianin, a anunsiá e anulashon di “tur evento deportivo, kultural i di karakter públiko” pa e fin di siman aki.
Segun un reportero dje agensia Ria Novosti, personanan den unifòrm di kamuflahe a drenta e sala di konsierto i a kuminsá tira promé ku nan a lansa sea ta un granada òf un bòm di kandela, provokando e insendio.
“Personanan ku tabata den e sala a tira nan kurpa na suela pa protehá nan mes dje disparonan durante 15 pa 20 minüt i hopi a logra sali lastrá”, segun a bisa mas aleu.
Servisionan di reskate a referí na “un grupo di dos pa sinku persona no identifiká, ku unifòrm di kombate i armanan outomátiko”, kendenan a kuminsá tira kontra agentenan di seguridat na entrada dje sala di konsierto, pa despues nan tira kontra dje públiko.
Segun e ministerio ruso di situashonnan di emergensia, bomberonan a logra na evakuá komo shen hende ku a bai skonde den kèlder dje edifisio, miéntras ku otronan a subi riba e dak.
E atake a tuma lugá durante di un konsierto dje grupo di rock ruso Piknik, di kua e miembronan a keda evakuá.
Insidentenan anterior
Rusia ya tabata blanko di vários atake kometé pa gruponan islamita i tiroteo sin motibunan polítiko òf atribuí na personanan ku problema mental. Den 2002, un grupo kombatiente chechenos a tuma 921 persona komo rehen den un teater, pa eksigí salida di tropanan ruso for di Chechenia.
Na e okashon ei forsanan spesial a intervení, pero finalmente 130 persona a muri i kasi tur a stek pa e gas usá pa militarnan.
