LONDON, AP.- E gobièrnu britániko a develá su plan pa separá di Union Europeo, kalifikando e komo “pragmátiko i ambisioso”, pero e proposishon a provoká renunsia di dos minister i probablemente lo enfrentá resistensia den e bloke kontinental.
E plan ta vislumbrá ku Gran Bretaña lo mantené un merkado liber di produkto ku UE.
Gobièrnu di e promé minister Theresa May ta deseá di satisfasé e británikonan ku a vota na fabor di separá di e bloke, agensianan di seguridat i otro instansianan ku un relashon estrecho ku UE, pero sin perhudiká e sektor empresarial.
Pero e plan no tabata sufisiente bon pa partidarionan di un salida total di UE, kende ta opiná ku esaki lo impedí Gran Bretaña di forma akuerdonan komersial ku otro partinan di mundu. Tantu e sekretario di relashon di eksterior Boris Johnson komo esun enkargá ku asuntunan di Brexit, David Davis, a renunsiá siman pasá ekspresando su oposishon pa e inisiativa aki.
E turbulensia den e gobièrnu britániko ta surgi na momentu ku e presidente merikano Donald Trump ta den e pais pa un bishita i na momentu ku falta solamente nuebe luna pa e salida britániko di UE.
