CHICAGO.- Presidente di Chicago Cubs, Theo Epstein, sa ku fanátikonan di e ekipo no ta muchu kontentu ku kon temporada a kuminsá. Den fin di siman durante un entrevista el a pidi diskulpa pa esaki pero a indiká ku e no tin preokupashon pa hasi niun kambio grandi. Mediante e matutino Chicago Tribune el a bisa ku e problema ta sintá den henter e ekipo i ku e ekipo mester hunga mihó pero no ta kere ku mester buska esküs lagando hungadó bai òf retirá hende. Pa Epstein esei lo no ta algu produktivo. El a agregá ku e ta komprondé e problema i ku tur kos al final ta su responsabilidat. Mènedjer, Joe Maddon, tambe ta komprondé e preshon pero ku no mester kai den pániko ainda. Segun Maddon e ekipo a hunga bon e último kuater añanan i ku e no ta kere ku e temporada aki mester bas’é riba un siman di temporada. Despues di ayera e ekipo tin marka di 2-7 i picheo prinsipalmente ta lagando e ekipo na kaya. Esaki a pone ku e coach di picheo, Tommy Hottovy, ta wòrdu reklamá pisá pa e prestashon di picheo di e ekipo. Epstein a bisa ku e si no ta tira kulpa riba Hottovy. Mas bien e ta kere ku e coach di picheo ta un parti grandi di e solushon. Tantu Epstein komo Maddon a bisa ku nan ta kere ku tin algun faktor ku ta hungando un ròl ku ta fuera di kòntròl di Hottovy. Segun Maddon ta fásil pa kritiká pero si bo ekipo ta hungando bon i bo bullpen tin un ERA riba ocho, esei ta kontestá tur e preguntanan.
