NEW YORK, AP.- Presidente di Warner Bros Kevin Tsujihara a renunsiá ayera di su puesto den e studio despues ku a surgi akusashonnan ku el a primintí un ròl na un aktris ku e tabatin romanse kuné.
E direktor general di Warner Media John Stankey a anunsiá e salida di Tsujihara komo presidente i direktor ehekutivo di Warner Bros.
“Kevin a kontribuí enormemente na e éksito di e studio durante di último 25 aña i nos ta gradisié”, asina Stankey a bisa. “Kevin ta rekonosé ku su erornan no ta loke ta spera di un lider di e kompania i por afektá e kapasidat di ehekushon di e kompania den futuro”.
WarnerMedia a kuminsá un investigashon na kuminsamentu di luna, despues ku Hollywood Reporter a publiká dia 6 di mart un nota den kual nan ta detayá mensahenan di teksto na 2013 entre Tsujihara i e aktris britániko Charlotte Kirk. E mensahenan ta insinuá un relashon seksual entre e aspirante pa aktris i e hefe di e studionan, den kual el a priminti’é ku e lo present’é na su hefenan i ku lo tuma su ròl pa aktua den sine i televishon.
Den un memo dirigí na e personal di Warner Bros ayera djaluna, Tsujihara a bisa ku e ta bandoná e kompania.
