NEW YORK, AP.- Su promé disko di bachata a keda sertifiká komo un tripel platina na Merka i a haña nominashonnan di Latin Grammy i Premionan Billboard. Awor Prince Royce ta spera di superá su propio éksito ku “Phase II”, un álbum ku e ta mantené riba nivel di romantisismo ku un zonido mas ‘pòp’, i ku asta ta inkluí algu di mariachi.
“E disko aki mi a dediká kasi un aña kompletu na dje”, asina e kantante di New York ku mayornan dominikano a bisa. “ Mi tabatin asina tantu éksito ku e promé álbum. E di dos álbum awor ta un reto pa superá e éksito ei ku e material nobo aki”.
Prince Royce a skirbi e 13 kantikanan di e produkshon, ku a sali na benta e siman aki bou di Atlantic Records i ku kasi tur kantika na Spañó. Riba e disko e tin un kansion ingles i dos ku meskla di ámbos idioma. Entre su títulonan e ta destaká e promé sensio “Las Cosas Pequeñas” i “Dulce”, kual e ta dediká na adolesentenan na estado, i ”Incondicional”, kaminda e artista di 22 aña ta meskla e género popular dominikano ku mariachi di Mexico.
Prince Royce, kende su nòmber berdadero ta Geoffrey Royce Rojas, a bira popular dos aña pasá ku e vershon bachata klásiko ‘Stand By Me’ di Ben E. King. Segun e revista Billboard, e artista aki tabata esun ku mas number unu den 2011.
“P’ami ta un honor i mi ta sintimi felis, pero e nominashon i premionan no ta pone ku mi ta bai pensa ku mi ta esun di mas mihó. Ainda mi ta den komienso i tin hopi mas pa mi traha”, el a agregá.
