DEN HAAG, ULANDA, AFP.- E presidente ruso Vladimir Putin, posiblemente a disidí pa entregá e misil na separatistanan pro ruso ku a basha e buelo MH17 abou na Ukrania na 2014, pero no tin prueba pa akusá e ni otro personanan, segun indikashon di investigadónan internashonal djárason.
E ekipo internashonal di investigashon konhunto (JIT), a afirmá ku tin “indikashon fuerte” ku Putin a aprobá pa manda e misil na sepratistanan pro ruso durante kombatenan ku a sosodé na ost di Ukrania den 2014.
Pero e investigashon a keda suspendé ya komo ku no tabatin mas prueba pa detené esnan responsabel ku a basha e avion abou, provokando morto di 298 persona na bordo di e avion.
E Boeing 777 di Malaysian Airlines a kai riba 17 di yüli 2014. Un misil BUK di fabrikashon soviétiko a kousa e kaida na momentu ku esaki tabata pasando riba region di Donbas, na ost di Ukrania.
Investigadónan a bisa ku responsabelnan ruso a aplasá e desishon pa entrega armanan den yüni 2014 pa motibu ku Putin tabata na Fransia e temporada ei.
Durante un rueda di prensa na Den Haag nan a publiká un yamada telefóniko interseptá di un konsehero bisando ku e retraso ta debí ku esun ku mester tuma desishon di e entrega ta na Fransia.
