HERUSALEM, AFP.- Promé minister israelí Benjamin Netanyahu a haña mas sosten di diputadonan pa forma un gobièrnu nobo, pero ainda e no tin garantia ku e lo bolbe okupá e puesto.
Presidente Reuven Rivlin a inisiá e negosiashonnan ku esnan responsabel di kada partido presente den Parlamento dos siman despues di elekshon legislativo di 23 di mart djaluna. E partido derechista di Netanyahu, Likud, tin mayoria asiento den parlamento (30 di 120) pero e resultado aki, kombiná ku esun di su aliadonan natural no ta garantisá e mínimo di 61 asiento pa keda designá. E kolaborashon ku otro partidonan ta garantisá 52 asiento na Netanyahu i su kolaboradonan.
Pa loke ta trata esnan kontra Netanyahu, 45 diputado a skohe pa sostené Yair Lapid, e hefe di partido Yesh Atid.
E promé minister di 71 aña ta akusá ku korupshon, froude i abusu di konfiansa den tres kaso. E ta ninga tur akusashon den su kontra.
Netanyahu a hasi mal uso di poder pa motibu ku el a eksihí i haña fondo di propietario di medionan di komunikashon prinsipal den Israel pa promové su asuntunan personal, entre otro, segun indikashon di e fiskal Liat Ben-Ari.
