CARACAS.- Te na momentu ku nos a bai imprenta, ainda e resultado di e votashon na Venezuela no tabata konosí.
Manera ta konosí ayera a tuma lugá e elekshon pa delegashonnan pa Asamblea Konstituyente. Hopi protesta a tuma lugá i ku a kousa mas di 10 morto. Te ku ayera nochi tabatin papia di 13 morto miéntras anochi a sera i konfrontashonnan a kontinuá.
E urnanan elektoral mester a sera 7 ‘or di anochi pero a alargá e orario ku un ora mas.
E informashonnan ku tabata sali di Venezuela tabata masha limitá ya ku outoridatnan a kore ku prensa tur kaminda ku a topa ku esakinan.
E elekshon di ayera ta duna e presidente Nicolas Maduro a poder pa remplasá e bòdi legislativo di Venezuela esta Asamblea Nashonal.
E elekshon a bin despues di simannan di violensia i ku a kulminá ayera ku vários morto entre nan dos menor di edat pero tambe un ofisial di Guardia National
E kantidat di mortonan a oumentá te na 125, segun un deklarashon di abogado general venezolano.
Den un mensahe masha kòrtiku di presidente Nicolas Maduro ayera a kalifiká e elekshon komo históriko. Esaki tabata un dia eksitoso.
Reakshonnan internashonal sinembargo tabata basta fuerte ku asta Nashonnan Uni ku a kondená e elekshonnan. Di otro banda manera a anunsiá kaba presidente merikano Donald Trump ta preparando sanshonnan kontra Venezuela.
E lider opositor Henrique Capriles di su parti a kalifiká e elekshon komo un froude i a yama pa akshon i protesta awe djaluna mèrdia.
E ta bisa ku ta un kantidat masha chikí di hende a sali bai vota.
