MOSKU (AFP).- E presidente ruso Vladimir Putin a keda re-eligí pa un di sinku periodo ku 87% di votonan, segun resultadonan preliminar divulgá ayera, de un elekshon den kua no a permití oposishon real.
E sifra ei, optené for di un sondeo dje instituto ofisial Vtsiom, a keda anunsiá pa televishon estatal. I, segun e komishon elektoral ruso, e hefe di Kremlin a optené 87.97% di e votonan despues ku a konta 24% dje urnanan elektoral.
E eks-presidente i number dos di Konseho di Seguridat ruso, Dmitri Medvedev, a aploudí e “viktoria rotundo” di Putin.
“Rusia a eligí”, segun deklarashon dje hefe di Komishon Elektoral, Ella Pamfilova, ku a anunsiá ku e partisipashon a alkansá e sifra rèkòrt di 74.22%.
Kremlin a deklará na medionan ruso ku Putin a keda informá di e resultadonan preliminar.
Putin, un eks-agente di KGB di 71 aña, ta na poder for di e último dia di 1999. Den kaso ku e kompletá un periodo nobo, lo el a keda na poder mas ku kualke otro lider ruso for di siglo XVIII.
E no tabatin opositornan real den elekshon, despues di a ekskluí dos kandidato ku ta kontra dje konflikto ku Ukrania.
E ekipo dje opositor ruso Alexei Navalni, kende a muri den prizòn, a denunsiá un resultado ku no tabatin “ningun relashon ku e realidat”.
E ofensiva den Ukrania, lansá pa Putin den febrüari di 2022 i sin final na bista apesar di desena di míles di morto, segun Kremlin tabata un okashon pa rusonan duna nan apoyo na e guera.
Despues ku e resultado a bira konosí, e presidente ukraniano Volodimir Zeleknski, a ekspresá ku Vladimir Putin ta “fuma di poder” i ke “reina eternamente”.
