JERUZALEM (AFP).- E hefe di gobièrnu aleman, Olaf Scholz, a hasi un apelashon pa “un akuerdo riba e rehennan i tambe un periodo di pas duradero” den Gaza, despues di un reunion na Jerusalem ku e promé minister israelí Benjamin Netanyahu.
“Ta nesesario un akuerdo riba e rehennan i pa stòp e hostilidatnan”, segun Scholtz, i a agregá di ta komprondé ku “famianan dje rehennan ta di opinion ku a yega tempu pa por tin un akuerdo ku ta salba esnan sekuestrá”.
Di su parti, Netanyahu den un konferensia di prensa huntu ku Scholz a señalá ku “lansa un operashon den Rafa no ta algu ku nos lo hasi lagando e poblashon atrapá einan”. El a agregá di no ta aseptá ningun akuerdo di pas ku ta “debilitá” òf stroba Israel, den e guera ku Hamas den e strook di Gaza for di 7 di òktober, i ku e ta defendé su mes di bisiñanan hostil.
“Si ta ofresé nos un akuerdo, un kaminda di pas ku ta debilitá Israel i ta stroba Israel pa defendé su mes… esei lo pone ku no tin pas”, segun el a bisa den konferensia di prensa despues dje reunion ku Scholz.
