SANTA CRUZ, BOLIVIA, AFP.- E region di Santa Cruz, motor ekonómiko di Bolivia a kuminsá e dia di ayera ku kamindanan blòkia riba e di sinku dia di wèlga pa eksigí un senso di e pueblo, aktualisá su representashon legislativo i e kantidat di fondonan estatal ku e pais ta risibí.
Apesar di e choke entre opositornan i siguidónan di e gobièrnu iskierdista di Luis Arce ku a laga un morto djasabra, mayoria protesta a kana pasífiko, segun indikashon di AFP.
E pueblo di Santa Cruz ke pa realisá un senso den 2023 i pa publiká e resultadonan promé ku elekshon na aña 2025.
E gobièrnu ke realisá esaki pa 2024, kual ta nifiká ku lo no prosesá e datonan nobo promé ku elekshon.
Despues di un negosiashon ku a frakasá, e presidente Arce a anunsiá un reunion ku gobernantenan di tur region di Bolivia pa haña “un solushon definitivo” tokante e fecha di e senso.
E gobernador di Santa Cruz, Fernando Camacho a konfirmá su presensia i a pidi mediashon di iglesia pa garantisá un “persona imparsial”.
