GENEVA, SUISA, AFP.- Nashonnan Uní ta usando imágennan di satélite di promé i despues (before and after) pa evaluá e destrukshon kultural kousá pa e guera di Rusia na Ukrania i anunsiá djárason ku lo lansa su plataforma pa sigui e imágennan den algun siman.
E agensia di kultura di Nashonnan Uní, UNESCO, a bisa ku a verifiká dañonan konra 207 sitio kultural na Ukrania desde komienso di e invashon di Rusia riba 24 di febrüari.
E sitionan ta inkluí 88 sitio religioso, 15 museo, 76 edifisio históriko òf artístiko, 18 monumento i 10 biblioteka.
E regionnan mas afektá ta na ost di Ukrania i alrededor di e kapital. Region di Donetsk tin 59 sitio kultural destruí, sigui pa Kharkiv ku 51, Kiev ku 30 i Luhansk ku 25.
E direktora kultural i di emergensia di UNESCO, Krista Pikkat a bisa na periodistanan den un seshon informativo na Ginebra ku e situashon ta malu i ku kosnan por sigui empeorá.
UNESCO a uni forsa ku Sentro di Satélite di Nashonnan Uni UNOSAT pa produsí e plataforma. UNESCO ta kumpra e imágennan di resolushon hopi haltu di Maxar i Airbus i ta paga 10 euro pa kilometer kuadrat.
Un ekipo chikitu di eksperto di UNOSAT ta studia e diferensia entre e imágennan di promé i despues.
