RIO DE JANEIRO, BRASIL, AFP.- Rio de Janeiro a deskartá ku lo selebrá su karnaval famoso den 2021, kual skolnan di Samba kier a organisá den yüli, debí na un oumento di e e kasonan di COVID-19 den Brasil, segun indikashon di e alkalde Eduardo Paes.
“Nunka mi a skonde mi pashon pa karnaval i importansia ekonómiko di e manifestashon kultural aki pa nos siudat. Sinembargo, no tin ningun sentido pa nos realisá e karnaval aki den yüli”, asina e mandatario a skibi riba Twitter.
E fiesta enorme aki ta tuma lugá den febrüari òf mart normalmente, promé ku kuaresma, pero den sèptèmber skolnan di samba enkargá ku e desfilenan a disidí ku lo aplasá esaki pa motibu di e promé ola di COVID-19.
Sin embargo, nan a determiná ku lo selebrá e karnaval den yüli pa motibu di e kampaña di vakunashon ku lo a tuma lugá e aña aki.
Apesar ku e kampaña di vakunashon a kuminsá djadumingu na Brazil, Paes a bisa ku ta “imposibel” pa organisá i realisá e karnaval mas grandi na mundu ku a afektá miónes di persona den pleno brote di e pandemia.
“E selebrashon ta eksigí preparashon di parti e órganonan públiko i gremionan institushonal ligá na samba, algu imposibel pa realisá na e momentunan aki”, asina e alkalde a splika.
