MOSKU, RUSIA, AFP.- Rusia a anunsiá ku e lo prohibí entrada na teritorio ruso di 398 miembro di kongreso merikano, komo represaya na un medida similar ku Washington a tuma pa e ofensiva di Mòsku na Ukrania.
“Komo reakshon na un ola nobo di sanshon antiruso tumá 24 di mart pa atministrashon di Biden kontra 328 diputado di Duma, a tuma medidanan komo represaya na 398 miembro di Kámara di Representantenan di Merka”, asina diplomasia ruso a bisa den un komunikado.
Den e komunikado aki, Rusia a publiká nòmber di e kongresistanan merikano i a prohibí nan entrada na e teritorio. Den otro teksto, e ministerio di relashonnan eksterior ruso a publiká sanshon semehante kontra 87 senador kanades i a anunsiá ku lo tuma mas medida kontra Canada pa su maneho ku ta falta vishon.
For di inisio di e operashon militar ruso na Ukrania, e sanshonnan oksidental kontra Rusia a bin ta oumentá, en partikular konsentrá den e parti di finansa i karbon. Tambe a dekretá ekspulshon di diplomátikonan ruso for di kantidat di pais oksidental.
